Buuggan waxaa wax ka baran kara ardada af Soomaaligu bilawga u yahay iyo weliba kuwa ka gudbay bilawga ee sii wadanaya barashada af Soomaaliga. Waxaa kale oo buuggan wax ka baran kara cid alla ciddii jecel ama doonaysa in ay barato luqada Soomaaliga ee aan asalkoodu Soomali ahayn. Waxa uu buugani ardada ka caawin doonaa barashada qorista, ku hadalka, iyo weliba akhriska af Soomaaliga. Waxaan ilaahay uga rajaynayaa in uu u fududeeyo inta rabta in ay wax ka bartaan ama wax ka dhigaan buuggan.

Waxaan aad ugu mahad naqayaa dhammaan intii gacanta ka gaysatay qorista buuggan oo aanan halkan magacyadooda ku soo koobi karayn. Kuwaas oo igala qayb qaatay sixitaanka, qoraalka iyo isku duba ridka buuggan. Waxaan jeclahay in aan mahad gaara u celiyo Cabdinasir M. Xaji Nur oo qayb weyn ka qaatay ururinta sawirada ku yaala buuggan, iyo Fosiya Maxamud Cali oo tarjumaadda faransiiska iga caawisay. Waxaan kale oo aan mahad ballaaran u celinayaa dhammaan ardaydii dugsiga Al-Khulafa, oo aan jeclaan lahaa in aan qaar badan oo ka mida xuso hasa yeeshee ka badan kuwu hordhacan yar lagu soo koobo, kuwaas oo ahaa ardaydii aan u dhigi jiray luqada af Soomaaliga oo runtii ahaa kuwii igu dhaliyey qoritaanka buuggan. Dhammaan casharada uu buuggani ka koobanyahyna waa casharadii aan ka bixiyey dugsiga Al-Khulafa Sanadkii 1999.

Waxaa buuggan qaybtiisa ugu danbaysa ku yaalla qaamuus yar oo erayada af Soomaliga ah ee buugga ku jira badankooda u tarjumaya luqooyin kala duwan, sida ingriisi, faransiis. 
 
 

U HIBEEYA
Inkastoon hayaan dheer hoygeeni kaga nimi 
Habqankeeni kala lumay dhul shisheeye hubuq yiri 
Afka hooyo waa hibo aynaan hilmaamayn oo noo hilaadiya 
Dhaqankeenna hodanka ah hidaheena hanadka ah 
Hadhac weeye geedoo oo lagu hirtaayoo 
Hooban macaniyo hadh qabawba laga helo 
Ee luqadaa hogaanoo aan lagu halmaamine 
Hooyo iyo aabow hormoodkii hadaaqiyo haasaawe 
dheer iyo gabay hoga tusaala ah kuwii laga hantiyayaw 
Ha ku daynin hororkiyo luqadaha habawshee haadaan 
ka ridayee hidaheena wacan iyo ka fogeeya hoyga'e 
Ubadkiinu hilin ay u maraan harada dhaqan 
afka hooyo weeyee u hibeeya oo bara .. u hibeeya oo bara